Fish Of The Day

-بعد جمعية الرجال المضطهدين إلي أسسها تونسي في جهة المرسى ولي وقع حلها مؤخرا (يظهرلي زوجة رئيس الجمعية احتجت عليه وطردتو من الدار) قالك يا سيدي رجل أعمال تونسي معروف كون "نادي للمطلقين" ونزيد نأكد للمطلقين فقط باش يخفف من عزلتهم الحاصل إلي إنجم نقولوا هو "صنعة إلي ما عندوش صنعة"...

-إلي يتفرج على برنامج "فجعة صباح" سامحوني "نسمة صباح" على قناة تونس سبعة يعدي نهارو مفرشك و في أقصى درجات السعادة خاصة كيف يشوف هاك الديكور التعيس والألوان الجنائزية وبربي نداء لمعد أو مخرج البرنامج فاش قاعدة تعمل هاك الخزانة الحمراء في الأستوديو؟ ونصيحة لمقدمة البرنامج نقص من الفذلكة الماسطة وراهي كلمة colonie متاع طيور ما تعنيش مصائف ولا مضائف...

-بربي قولولي بأي حق تنشر بعض جرائدنا تصاور العباد باش تزين بيهم المقالات ومن غير ما تشاورهم حبيت نعمل الملاحظة هذي على خاطر ما نتصورش حتى حد يقبل باش تهبط عليه المكالامات الهاتفية من كل حدب وصوب في الليل وفي الصباح ووقت الفطور juste باش يقولولو راهم شافو تصويرتو في الجريدة …

-توة عندي مدة واني نحب نعرف علاش في تونس كيف ياخو الواحد تاكسي وكلامي لهنا موجه للرجال ما يركبوش في المقعد الخلفي للتاكسي؟ ما نتصورهاش ظاهرة ثقافية أم نقول مسالة متعلقة بالعقلية على خاطر كيف تركب من تالي يبدا التكسيست يقحرلك وكان يلقى يقلك سامحني اهبط من كرهبتي راني ما عادش نخدم تاكسيست خلي كيف عاد تطلب كاس ماء في مقهى تقولش عليك سبيت السرفور...

وللحديث بقية...